Üsküdar Universiteti haqida
Üsküdar Universiteti 2011-yilda ruhiy salomatlik, psixologiya va terapiya yo‘nalishlarida faoliyat yuritib kelayotgan NP Group tomonidan tashkil etilgan. Universitet asosiga NP Group’ga qarashli klinikalar, tadqiqot markazlari va ixtisoslashgan laboratoriyalar kiritilgan. Shu sababli ta’lim jarayonida talabalarga amaliyot bilan bog‘langan real klinik va ilmiy muhit taklif etiladi. Ayniqsa psixologiya, neyrofanlar, neyrofarmakologiya va sog‘liq bilan bog‘liq yo‘nalishlarda universitetning shakllanish modeli boshqa xususiy universitetlardan sezilarli darajada farq qiladi.
Universitet Istanbul shahrining Üsküdar tumanidagi Altunizade hududida joylashgan. Bu hudud shahar markaziga yaqinligi, transport qulayligi va xavfsizligi bilan ajralib turadi. Kampuslar Yevropa va Osiyo qit’alarini bog‘lovchi nuqtaga yaqin bo‘lib, xalqaro talabalar uchun kundalik hayot va ta’limni uyg‘un olib borish imkonini beradi. Ta’lim jarayonida Yevropa kredit tizimi (ECTS) qo‘llaniladi, dasturlar Yevropa oliy ta’lim mezonlariga moslashtirilgan.
Üsküdar Universiteti Kampuslari :
- Asosiy Kampus (Altunizade Kampusi) Google Xaritalar
- Üsküdar Çarşı Kampusi Google Xaritalar
- Altunizade Janubiy Kampusi Google Xaritalar
- Tibbiyot Fakulteti Kampusi: Ümraniye tumanida joylashgan. Google Xaritalar
- Stomatologiya va Sog’liq Bilimlari Fakulteti: Bu ham Ümraniye tumanida joylashgan. Google Xaritalar
Kampuslar o‘quv binolari, laboratoriyalar, klinik amaliyot zonalari, kutubxona va talabalar uchun ijtimoiy hududlar bilan ta’minlangan.
Fakultetlar
Üsküdar Universitetida quyidagi fakultetlar faoliyat yuritadi:
- Tibbiyot fakulteti
- Stomatologiya fakulteti
- Muhandislik va Tabiiy fanlar fakulteti
- Sog‘liq Bilimlari fakulteti
- Muloqot (Kommunikatsiya) fakulteti
- Gumanitar va Ijtimoiy fanlar fakulteti
Ko‘plab yo‘nalishlarda ta’lim turk va ingliz tillarida olib boriladi. Dasturlar uchun tayyorlov (foundation) yoki til kurslari mavjud.
Magistratura va Doktorantura
Universitetda magistratura va PhD bosqichlarida ta’lim beruvchi 5 ta institut mavjud:
- Qaramlik va Sud tibbiyoti fanlari instituti
- Fan bilimlari instituti
- Sog‘liq bilimlari instituti
- Ijtimoiy fanlar instituti
- Tasavvuf tadqiqotlari instituti
Bu institutlar orqali ilmiy izlanishga yo‘naltirilgan, amaliyot bilan bog‘langan magistr va doktorantura dasturlari taklif etiladi.
Ilmiy markazlar va infratuzilma
Üsküdar Universiteti tarkibida 39 ta tadqiqot markazi va 86 ta laboratoriya mavjud. Ular neyrofanlar, psixologiya, sog‘liqni saqlash, biotibbiyot, toksikologiya va sud tibbiyoti kabi yo‘nalishlarda faol ishlaydi. Talabalar bakalavriat bosqichidan boshlab ilmiy loyihalarda qatnashish imkoniga ega.
Üsküdar Universitetining asosiy yo‘nalishdagi ustunliklari
Üsküdar Universiteti, ayniqsa, quyidagi talabalar uchun mos:
- psixologiya, neyropsixologiya va neyrofanlar yo‘nalishiga qiziqqanlar
- sog‘liqni saqlash va klinik amaliyot bilan bog‘liq sohada o‘qishni istaganlar
- nazariy bilim bilan birga real muhitda tajriba orttirishni maqsad qilganlar
Universitet Turkiyada bakalavriat darajasida sud ekspertizasi bo‘yicha to‘liq dastur joriy qilgan ilk xususiy oliygohlardan biridir. Neyrofarmakologiya va miya tadqiqotlari bo‘yicha olib borilayotgan ilmiy ishlar NP Group klinik bazasi bilan chambarchas bog‘langan. Ayrim professor-o‘qituvchilar ruhiy kasalliklarni davolashga oid patentlangan ilmiy ishlarga ega.
Talabalar Erasmus+ dasturi orqali Yevropa universitetlarida bir yoki ikki semestr o‘qish imkoniyatiga ega. Akademik ko‘rsatkichlari yuqori bo‘lgan talabalar uchun ichki grant va stipendiya tizimi mavjud. Shuningdek, ikki mutaxassislik (Double Major) dasturi orqali parallel yo‘nalishda ta’lim olish mumkin.
Universitetda 70 dan ortiq talabalar klubi faoliyat yuritadi. Bu klublar orqali talabalar ijtimoiy, madaniy va professional ko‘nikmalarini rivojlantiradi.
Akkreditatsiyalar va tan olinishi
Üsküdar Universiteti quyidagi akkreditatsiyalarga ega:
- FEDEK – tabiiy fanlar, gumanitar va ijtimoiy fanlar yo‘nalishlari
- Pearson – xorijiy tillar va kasbiy dasturlar
- ISO 9001 – klinik va sog‘liq xizmatlari boshqaruvi
- ISO 17025 – tadqiqot va tahlil laboratoriyalari
- TWAS–UNESCO Associated Membership – xulq-atvor va sog‘liq fanlari yo‘nalishida
Universitet diplomi Turkiya, Yevropa Ittifoqi mamlakatlari, O‘zbekiston, Ozarbayjon, Qozog‘iston va boshqa turkiy davlatlarda tan olinadi.
Qabul uchun talab qilinadigan hujjatlar
- Maktab attestati yoki kollej/litsey diplomi (asl nusxa)
- Diplom yoki attestatning turk tiliga tarjimasi
- Amaldagi pasport nusxasi
- Shaxsiy fotosurat
- Til sertifikati (agar mavjud bo‘lsa: TOEFL, TÖMER va boshqalar)
Üsküdar Universiteti nazariy bilimni amaliy muhit bilan bog‘lashni xohlaydigan, sog‘liq va inson xulq-atvoriga oid sohalarda chuqur o‘qishni rejalashtirayotgan talabalar uchun maqsadli tanlov hisoblanadi.
